उठा उठा मायबाप । नका येऊं देऊं झोंप । आली वो आली यमाजीची तलब ॥ १ ॥
तुमचे गांवांत नाहीं पाटीलबावा । पाटलीण आवाचा मोठा दावा । घरचें घरकूल झाकून ठेवा ॥ २ ॥
तुमच्या सुनेची नाहीं वागणूक बरी । तिचे घरधनी मनाजी पाटील थोरी । त्यांच्यातील वाद सार्या गांवांत भारी ॥ ३ ॥
पाटीलबावाची ऐकावी थोरी । सहा कारभार करती घरीं । पांच तीं पोरें रडती दारोदारीं ॥ ४ ॥
आतां पाटीलबावा तुम्ही हुशारी धरा । यमाजीबाजी वो येतील घरा । इकडून तिकडे वो नाहीं पळाया ॥ ५ ॥
एका जनार्दनीं कांही हित करा । आपला आपण चुकवा फेरा । जन्ममरणाच्या तोडा येरझारा ॥ ६ ॥
आपण साहित्यिक आहात ? कृपया आपले साहित्य authors@bookstruckapp ह्या पत्त्यावर पाठवा किंवा इथे signup करून स्वतः प्रकाशित करा. अतिशय सोपे आहे.
