संकीर्ण : ओव्या

मेहुण मला हवें             आवडीचीं दोघे
पुढें कंथ तूं मागें             रखुमाई                                 १

मेहुण मला हवें             राधा-दामोदर
भवानी-शंकर                 चौघे यावीं                             २

लांब लांब केस             विठोबा तेलंग्याचे
चारी खूर पलंगाचे             झांकीयेले                            ३

आम्ही सहा जणी         सहा गांवीच्या खारका
मध्यें नांदते द्वारका             तुळसादेवी                        ४

आम्ही चौघी जणी         चार बाजूंचे कळस
मध्यें शोभते तुळस             मायबाई                           ५

अंगाईचे घरी             मंगाई राखण
संवगाईचें दुकान             रस्त्यावरी                           ६

बोरीबंदरावर             मड्डम खाते पेरू
आगीनगाडी केली सुरू             इंग्रजांनी                      ७

बोरीबंदरावर             मड्डम खाते केळ
आगीनगाडीची झाली वेळ         रूळावरी                       ८

बोरीबंदरावर             मड्डम खाते संत्र
आगिनगाडीचें मोडलें यंत्र         रूळावरी                       ९

बोरीबंदरावर             मड्डम खाते काकडी
आगीनगाडी झाली वांकडी         रूळावरी                     १०

बोरीबंदरावर             मड्डम खाते बिस्कुट
आगीनगाडीचें फिरले मुस्कुट         रूळावरी                 ११

बोरीबंदरावर             मड्डम पीते चहा
आगीनगाडी आली पहा             रूळावरी                    १२

आगीनगाडी बिगिनगाडी     गाडीला डबे डबे
बैलावीण चाल नीघे             रूळावरी                         १३

तारूं लागलें बंदरा         भाईरायांना ग सांगा
वेलदोडे लवंगा                 स्वस्त झाल्या                   १४

सरलें दळण             उरला एक दाणा
गोकुळी कृष्णराया             यशोदेचा                         १५

सरलें दळण             राहीलें सुपाकोनी
विठ्ठल-रखुमाई             गाईलीं रत्‍ने दोन्ही              १६

सरलें दळण             सरलें म्हणूं नये
सासर माहेर                 नांदतें माझें सये                   १७

सरलें दळण             सरत्या पुरत्या गंगा
येथून नमस्कार             काशीच्या ज्योतिर्लिंगा           १८

सरलें दळण             मी आणीक घेणार
बैल कोटीचे येणार             विठ्ठलाचे                       १९

सरलें दळण             पुन्हा घेतलें पायली
लक्ष तुळस वाहिली             विठ्ठलाला                     २०


आपण साहित्यिक आहात ? कृपया आपले साहित्य authors@bookstruckapp ह्या पत्त्यावर पाठवा किंवा इथे signup करून स्वतः प्रकाशित करा. अतिशय सोपे आहे.
Please join our telegram group for more such stories and updates.telegram channel